Albisteak

UNICEF Haurren Laguntzarako Nazio Batuen Funtsak Konponbide Txikiak izeneko kanpaina berria aurkeztu du. Honen bidez, alde batetik, herritarrak kontzientziatu nahi dituzte eta txertoek daukaten garrantzia helarazi nahi dutela azpimarratu du Naia Diez komunikazio arduradunak. 14 milioi haur inguruk ez dute txertorik jasotzen eta bizi dugun pandemiak ere, testuinguru honetan eragin handia izan dezakeela gaineratu du. Bestalde, Haurren Laguntzarako erakunde honek txertoak munduko leku guztietara heltzea nahi du.

Hamabigarren Euskal Soziolinguistika Jardunaldia hilaren 28an gauzatuko da Eskoriatzan. Gazte eta nerabeen esparruan euskararen biziberritzearen ikuspegitik lantzen ari diren ikerketak, berrikuntza eta garapen proiektuak ezagutu eta lantzeko aukera emango du eta izena emateko epea zabalik da, urriaren 23ra arte.

Badirudi osasun-krisia okerrerantz doala. EAEn 819 positibo berri atzeman dituzte, 10.817 PCR proba egin ondoren; eta 100.000 biztanleko hamalau eguneko inzidentzia tasa 391,82koa izan da. Lurraldeka aztertuz, Araban 85 kutsatu berri detektatu dituzte, Bizkaian 342 eta Gipuzkoan eman dira daturik txarrenak, 377 kasu berri atzeman baitituzte.

Josep Lluis Trapero Eskuadra Mossoen buru ohia absolbitu egin du Audientzia Nazional espainiarrak. 2017ko urriaren 1eko erreferendumaren testuinguruan mossoek izandako jarreragatik epaitu dute, orduko Governeko presidentarekin eta kontseilariekin egin zuten moduan. Haien kasuan ez bezala, Trapero absolbitu egin du Audientza Nazionalak.

Audientzia Nazional espainiarrean deklaratu ebhar izan dute gaur hainbat militante independentista galiziarrek. Hortik abiatuta, estatu espainiarrak justizia Galizan, Katalubnian eta Euskal Herrian independentismoaren kontra egiteko tresna gisa darabilela salatu du Estitxu Garai EHUko ikerlariak. Horrez gain, Covid-19a edla eta Adinekoen egoitzetan sortzen ari diren egoeren aurrean erakunde publikoen ardura herritarren ongizatea bermatzea dela berretsi du.

Donostiako Zero Pobrezia plataformak hamabost urte daramatza pobreziaren aurka, mugarik gabeko elkartasunaren alde eta herritar guztiek eskubide guztien jabe izan behar dutela aldarrikatuz. Pobreziaren aurkako Nazioarteko Eguna hilaren 17an izan zen eta horren harira, hainbat ekintza antolatu zituen plataformak, besteak beste, bizikleta-martxa herrikoi eta erreibindikatzailea.