‘Ez Sanferminen’ izendapena mediatikoki eta era ofizialean erabili ostean, orain Enrique Maia alkateak eskatu du ‘ez jaiak’ izendapenaren erabilera ekiditeko “posibleki ospakizunak antolatzea sustatu dezakeelako”.
Maia alkateak Sanferminetako mahaiarekin izandako bileran eskatu du egiten diren ekimenak “izaera pribatukoak” izan daitezela. Kolektiboei eskertu die hiriburuko festak bertan behera uzteko erabakiarekiko emandako “erantzun on eta arduratsua”.
Hondartza denboraldia uztailaren 1ean hasiko da Gipuzkoan. Era berean, herrialdeko hondartzek sorosle zerbitzua bermatuko dute ekainaren 15etik aurrera. Egun horretan bertan, hasiko da hondartzen denboraldi berria Bizkaian. Baina, nolakoa izango da? Hortaz aritu da Amets Jauregizar Bakioko alkatea, esan duenez, garrantzia handia hartuko dute aforoa neurtzeko tresnek eta, hiru ordutik beherako egonaldien aholkuak.
Atzo tabernak itxi behar izan zituzten Bilboko erdiguneko Ledesma kalean. Eguerdian jendea pilatu egin zen, eta askok ez zuten utzi bi metroko tartea. Udaltzainak kale horretara joan ziren, eta arauen berri eman zieten tabernariei, baina ez zuten isunik jarri. Orduan, tabernariek terrazak itxi zituzten urruntzeko neurriak betearazteko modurik ez zutela argudiatuta. Bilboko Zapikaleetan ez zen arazorik egon. Pilaketok berriz jazo ezin direla ohartarazi du Juan Mari Aburto Bilboko alkateak, eta zigorrak «zalantzarik gabe» ezarriko dituztela esan du.
