Pello Zabala fraide frantziskotarra eseri da gurean. Bere ibilbidea errepasatzearekin batera, bide hau hartzearen ondorioz alde batera utzi behar izan dituen kontuen inguruan aritu gara. Adibidez, inoiz maitemindu al da Pello Zabala? Bestalde, egun pil-pilean dauden gaiez galdetu diogu: homosexualitatea, familia eredu berriak, pederastia, Euskal Herriko egoera politikoa... Ez da isilik gelditu! Eta, nola ez, eguraldiaz ere hitz egin dugu.

Kontxita Beitia ikastolen sortzaile eta andereñoarekin garai horiek ekarri ditugu gogora. Euskara galdu ostean, Elbira Zipitriarekin hizkuntza berreskuratu eta ikasketa metodologia berriak barneratu zituen. Hogei urterekin jarri zuen martxan Pasai Antxon, isilpean ikastolan. Bere etxean bost ikasle bildu zituen. Ondoren, Donostian ere, Zurriola Ikastola sortu zuen. Euskararen aldeko borrokak gidatu du bere bizitza eta oraindik ere, 76 urterekin, horretan jarraitzen du.

Julian Iantzi aurkezlea gertutik ezagutu dugu Hurbilean saioan. Urteak daramatza Irunen bizitzen baina argi dio lesakarra dela. Hala ere, AEBetan jaio eta zazpi urterekin etorri zen Euskal Herrira. Izatez kazetaria ez bada ere, bere saltsero izaerak eraman du telebistara. Honek bere egunerokoan zein eragin izan duen, zein aspektu aldatuko lukeen eta etorkizunera begira zein proiektu dituen galdetu diogu besteak beste.

Miren Amuriza bertsolaria izan dugu Hurbilean saioan gonbidatu. Bere bertsolaritza ibilbidea errepasatzearekin batera, gaur egun zein proiektutan murgilduta dabilen ezagutu dugu. Besteak beste, Euskal Herriko txoko ezberdinetan eskaintzen dabilen "Kapulana bat zintzilik" emanaldiaren berri eman digu, Mozanbiken bizitako esperientzia geurera ekarriz.