Hona Hemen

Atez atekoa edo bosgarren edukiontzia. Bi aukera horien artean erabaki beharko dute, igandean, Astigarragako herritarrek. Hiru urte daramatzate atez ateko sistemaren bitartez hondakinak biltzen, badute esperientzia beraz. Orain zein sistema nahiago duten esango dute.

Euskal preso eta iheslari ohiek antolatuta igandean manifestazioa egingo da Bilboko kaleetan Amnistiaren norabidean, euskal preso eta iheslariak etxera lelopean. Mobilizazioaren helburuez eta presoen egoeraz hitz egin dugu antolatzaileetako batekin, Juan Mari Olanorekin. 

Pasa den urtean jaiotako oiartzuarrei ongietorria egin zien Oiartzungo udalak martxoaren 20an. Guztira 97 dira iaz jaiotakoak, eta horietako hainbaten guraso, senide eta aiton-amonek parte hartu zuten ekitaldia. Bigarren urtea da guraso talde batek udalarekin elkarlanean Atsolorra eguna antolatzen duela. Gurasoekin, udaleko ordezkariekin eta Mari Karmen Basterretxea antropologoarekin izan ginen.

Kirola, kultura eta gastronomia elkartzen dituen jaialdia da BasqueFest. Martxoaren 24tik 27ra ospatuko dira jaialdiaren baitan dauden jarduerak Bilboko zenbait puntutan. Arte erakusketak, kontzertuak edota herri-kirolaz gozatzeko aukera egongo da.

Donostiako Egia auzoan astebetez euskaraz bizitzeko hautua egin dute hainbat herritarrek. Guztira zazpi aste pasatu dituzte horrela, lekukoa eskuz esku pasatu eta 200 lagun baino gehiagok parte hartu dute ekimenean. Esperientzia nolakoa izan den kontatu digute.

Donostiako San Telmo Museoak Donostia 2016 Fundazioarekin batera, artisten bi belaunaldi bildu ditu "1966 | Gaur konstelazioak | 2016" izeneko erakusketan. 1966an sortu zen Gaur taldeko zortzi artisten lanak ikusi ostean, "Kairós" izenpean, egungo beste zortzi artisten lanetan murgilduko gara. Baina zer dute komunean bi atalek? Haustura: 1966ko zein gaur egungo testuinguruaren aurrean, artearen bidez irakurketa kritikoa egiten dute. Museoko kide Nerea Izagirrerekin egon gara erakusketaren eta honen harira antolatu diren jardunaldien berri izateko.