Hona Hemen

Turistentzako Euskarazko Hiztegi Txikia argitaratu dute Donostiako Udaleko Euskara Zerbitzuak, Donostia 2016 Fundazioak, Donostia Turismoak eta Bagera Donostiako Euskaltzaleen Elkarteak elkarlanean. Bertan, hirira bisitan datorren horri lagungarri egingo zaizkion hitz eta esaldiak bildu dituzte zortzi hizkuntzatan. Guztira 80.000 ale argitaratu dituzte oraingoz eta besteak beste, turismo bulegoetan, hoteletan edota museoetan eskuratzeko aukera egongo da.

Emakumeen egunaren harira Getxon hainbat ekitaldi antolatu dituzte. Pasa den igandean, World Cafe-a eta "Aktibatu zure ahotsa" performance-a egin zuten herriko hainbat emakumek. "Zenbat kostatu, zenbat balio? Eraiki dezagun zaintzartasuna" berbaldia egin zuten Bilgune Feminista, Gizatiar, Eskuz Esku, Haziak, Mujeres con Voz, Itzubaltzetako Emakumeen Asanblada eta E-civis elkarteek antolatuta.

Nafarroako Ikastolen Elkarteak 2016-2017 ikasturteko aurrematrikulen kanpaina abiatu du. Horren harira, aurten dituzten helburu eta aurreikuspenak jakin asmoz, Josu Reparaz, Nafarroako Ikastolen Elkarteko zuzendariarekin izan gara.

Info7 Irratiak hamar urte bete ditu. Zein bide hartuko zuen oso argi izan gabe, ekin zioten hasieran internet bidez entzun zitekeen irratiari. Oraindik ere lizentzien afera konpontzeke dute, baina euskal herritar askoren egunerokoaren parte dira bertan aritzen diren kazetari zein herritarren ahotsak. Lan handia eginez eta bazkideen laguntzaz, ahots guztiek tokia duten programazio aberatsa osatu dute. Hau guztia ospatu eta etorkizuneko erronkei eusteko "Entzutekoa da, kontatzeko gaude" lelopean, urte berezia izango dute aurtengoa. Irratiko langileekin izan gara.

Euskal currikulum-ean oinarritutako hezkuntza proiektu berritzailea darama aurrera Leioako Betiko ikastolak, teknologia berrietan trebatuko ikasle euskaldun eleaniztunak sortzeko. Beti ere, guraso eta hezitzaileen elkarlana sustatuz.

Hizkuntz Eskubideen Behatokiak Akuilari izeneko aplikazioa aurkeztu du. Euskaraz bizi nahi duten pertsonei zuzenduriko tresna da, eta kexa edo zorionak bidaltzeko aukera ematen du. Alegia, hizkuntza-eskubideak urratzen badira kexa, eta bermatzekotan zoriona. Garbiñe Petriati Behatokiaren zuzendariak eman dizkigu xehetasun gehiago.