Azken bideoak: Gizartea

Pedro Sanchezen gobernuak alarma egoera dekretatu ondoren, Urkulluren exekutiboak gehitutako neurriak aztertu ditugu Estitxu Garai EHUko irakaslearekin. Azaldu digu ez direla neurriak ondo azaltzen ari, eta ez dutela argi uzten zergatik diren eraginkorrak martxan jarri direnak. Are gehiago, neurri horietako batzuek, etxeratze aginduak kasu, pandemiaren kudeaketa tonu militarrera daramala kritikatu du Garaik. Horrez gain, igandean Txilen ospatutako erreferendumaren harira aipatu digu aukera berri bat zabaltzen dela orain Txilen, azken urtebetean egindako borroketan izandako atxilotu eta hildako guztien ondoren.

Ipar Euskal herrian konfinamendu berria indarrean sartu baino ordu batzuk lehenago hitz egin dugu Eguzki Urteaga soziologoarekin. Oraingo konfinamentua arinagoa izango den arren, eragin ekonomikoak izango dituela azaldu digu. Horrez gain, Frederik "Xistor" Haranburu aske uzteko erabakiari buruz ere hitz egin digu. Ipar Euskal Herrian kultura politikoan eman den aldaketak berebiziko garrantzia zian du erabaki horretan Urteagaren iritziz.

Eneko Axpe fiskaria elkarrizketatu dugu Hamaika Telebistan. Axpek nabarmendu du 100.000 biztanleko zortzi pertsona hiltzen ari direla egunero munduan. Egoerari buelta emateko, txertoa lortu behar dela azpimarratu du, eta bitartean, neurriak hartu behar direla. Fisikariak nabarmendu du Euskal Herriko egoera txarra dela, eta munduko hirugarren postuan dagoela 100.000 biztanleko 903 heriotzarekin.

Nafarroako egoerari dagokionez Gobernuak eman duen informazioaren arabera, herrialdeak 438 positibo eman zituen atzokoan eta gaurkoan Gobernu Irekiaren webguneko datuen arabera, 525 dira kutsatutakoak.

Alba Ròda ezagutzen jarraituko dugu ostiraleko saioan. Figueras-en jaioa, orain dela bi urte etorri zen kataluniatik lesakara bizitzera. Irisarriland-eko harreran egiten du lan eta hara joango gara egunerokoan euskararen erabileraz hitz egitera. Gero, Lesakara bueltatuko gara bere laguna den Jonerekin batekin pote bat hartzera. Jonek esanda: "Ez dut gogoratzen ere berekin konbertsazioa gaztelaniaz egiten nuenik!"

Ipar Euskal Herri osoan itxialdia hasi dute jada eta neurri hori abenduaren 1a arte izango da indarrean, baina luzatzeko aukera izango du presidenteak. Nafarroara begira, Maria Txibite Nafarroako Gobernuko lehendakariak iragarri du hilabete "zailak eta gogorrak" datozela. "Erronka historikotzat" jo du COVID-19aren izurria, osasun krisiak ondorio ekonomiko eta sozial larriak utzi dituelako eta 695 nafar hil direlako gaurdaino, horietako bost atzo. Euskal Autonomia Erkidegoan, aldiz, ELA, LAB, SATSE, SME, CCOO, UGT, ESK, SAE eta UTESE sindikatuek Osakidetzan lurraldeka deituriko hiru greba egunetako lehena izan dute gaur Araban.