Markel Irizar, "Bizipoz" izengoitiaz ezaguna den 39 urteko txirrindulari gipuzkoarrak, txirrindularitzari agur esango dio 2019an. Agur beroa izango dela ziurtatu du, abuztuaren 3an ospatuko den Donostiako klasikoan egingo baitu bere azken lasterketa. Markelen historia zinez gogorra izan da. Jubeniletan (2002.urtean), profesionaletara saltoa egin baino lehenago, barrabiletako minbizia izan zuen txirrindulari oñatiarrak, eta kimioterapia jaso behar izan zuen. Hala ere, urte baten buruan, pedal kolpe indarberrituaz igo zen txirrindura, eta 2004an profesionaletara igaro zen, Euskaltel-Euskadiren maillot laranja jarriz. 2010ean Radioshak taldeak fitxatu zuen, eta 2014tik Trek taldean jardun du. Erlojupekoetan berezitutako gipuzkoarrak 20 aldiz hartu du parte hiru itzuli handietan, eta garaipenik entzutetsuena 2011ko Andaluziako itzulian lortu zuen.