Albisteak

Euskal Herria mailan lehen aldiz kalamu elkarteak arautuko dituen ordenantza bat aurkeztuko da. Honek, bi helburu nagusi izango ditu; batetik, menpekotasunak sortzen dituzten arriskuak gutxitzea, eta bestetik, kontsumitzaile ez diren herritarren eskubideak bermatzea.

Espainiako banderen afera dela-eta, Auzitegi Gorenak apirilaren 27ra arteko epea ezarri zion Aldundiari Espainiako bandera jar zezan. Horren aurrean, Batzar Nagusietan erabaki zuten Aldundian plaka bat jartzea. Neurri hori nahikoa ez dela iritzita, ikurrina bat jarriko dute aldarrikapen moduan, apirilaren 26an egingo den ekitaldian.

Apirilaren 5ean abortatzeko eskubidearen alde, Iruñeko kaleak hartzeko dei zabala egin du Abortatzeko Eskubidearen Aldeko Bizkaiko Plataformak. Abortuaren erreforma berriak abortatu nahi duten emakumeak atzerrira bidaiatzera behartuko dituela salatu dute. Manifestazioa Iruñeko Golem zinematokien ondotik aterako da arratsaldeko 17:30ean. Gainera bertara joateko hainbat autobus antolatu dituzte.

Krisiaren aitzakiapean soldaten aurkako erasoa egitea leporatu die sindikatuak patronalei. Erreforma guztiak horretara bideratuta daudela salatu dute, eta negoziazio kolektiboaren blokeoaren aurrean lantokiz lantoki borrokan jarraitzeko asmoa azaldu. Instituzioei dei egin diete gutxieneko soldata duina bermatzeko bidean lan egin dezaten.

Ibon Areso izendatu dute Bilboko alkate EAJren babesarekin eta PP, PSE-EE eta Bilduren abstentzioarekin. Iñaki Azkunaren lekukoa hartzea ohorea dela esan du Aresok.

Eusko Jaurlaritzak torturari buruzko azterlan baten zuzendaritza zientifikoa egiteko eskatu dio Francisco Etxeberria EHU-ko auzi medikuntza irakasle eta Kriminologiaren Euskal Institutuko kideari. Aurreikuspenen arabera, ekainean ekingo diote lanari, eta nabarmendu dute Istanbulgo Protokoloa aplikatuko dutela.