Gurean Gaur

Emakunderen kokapen organikoa aldatu egin da Eusko Jaurlaritzaren egitura berrian, eta aurrerantzean ez da egongo Lehendakaritzari atxikita. Iñigo Urkullu Jaurlaritzako lehendakariak bere sailetik atera du institutua, eta Gizarte Politiken Sailaren esku utzi du. Erabakiari kritika zorrotzak egin dizkiote talde feminista ugarik. Besteak beste, Euskal Herriko 70 talde feministak baino gehiagok agiri bateratu bat kaleratu dute neurria salatzeko. Plazandreok plataformak ere bat egin du idatziarekin. Eta, kide den Arantza Camposek azaldu bezala, «hanka sartze itzela» izan da Jaurlaritzak hartu duen erabakia. Gainera, gehitu duenez, ez dago ulertzerik aldaketa zertara datorren.

‘Ez Sanferminen’ izendapena mediatikoki eta era ofizialean erabili ostean, orain Enrique Maia alkateak eskatu du ‘ez jaiak’ izendapenaren erabilera ekiditeko “posibleki ospakizunak antolatzea sustatu dezakeelako”.

Donald Trump Ameriketako Estatu Batuetako presidenteak atzo adierazi zuenez, "beste bost herrialdek" laster harreman diplomatikoak izango dituzte Israelekin. Izan ere, Etxe Zurian Israelgo Gobernuak Arabiar Emirerri Batuekin eta Bahreinekin "Abrahameko Akordioak" sinatu zituzten atzo. Palestinarrentzat eta estatu bat eratzeko asmoentzat "labankada" izan dena.

Azaldu dute urteko lehen seihilekoan bertan behera utzi behar izan zituzten ikuskizunak berreskuratzeko esfortzua egin dutela, eta lortu ere egin dutela. Euskal artistek presentzia nabarmena izango dute. Izaro Andres eta Xabi Solano musikariak, Artedrama eta Tartean teatro konpainien antzezlanak eta Aukeran dantza taldearen emanaldia biltzen ditu programazioak, besteak beste.

Baikoko pilotariak mobilizazioak egiteko prest daude enpresak jarrera aldatzen ez badu. Baiko enpresako pilotari gehienek sinatutako agiria irakurtzeko agerraldia egin dute Tolosan; Aimar Olaizola, Ander Imaz, Mikel Urrutikoetxea eta Mikel Larunbe pilotariek ez dute agiria sinatu.

Idoia Mendia lehendakariorde eta Lan eta Enpleguko sailburuak gizarte-eragileekin egingo dituen aldebiko lehen topaketak hasi ditu. Asteazken honetan Confebask, UGT eta CCOOrekin bildu da. Ostegunean ELArekin bilduko da, eta, ostiralean berriz, LAB sindikatuarekin.