Gurean Gaur

Euskal Autonomia Erkidegoko ogasunek argitaratu dute zordun handien zerrenda. Hiru aldundien ogasunei milioi bat euro baino gehiago zor dieten enpresak eta norbanakoak agertzen dira zerrenda horretan. Kasu honetan, 2019ko abenduaren 31n zor hori zutenak dira. 250 izen ageri dira zerrenda horretan, eta 850 milioi zor dizkiete ogasunei.

Nafarroako egoerari dagokionez Gobernuak eman duen informazioaren arabera, herrialdeak 438 positibo eman zituen atzokoan eta gaurkoan Gobernu Irekiaren webguneko datuen arabera, 525 dira kutsatutakoak.

Ipar Euskal Herri osoan itxialdia hasi dute jada eta neurri hori abenduaren 1a arte izango da indarrean, baina luzatzeko aukera izango du presidenteak. Nafarroara begira, Maria Txibite Nafarroako Gobernuko lehendakariak iragarri du hilabete "zailak eta gogorrak" datozela. "Erronka historikotzat" jo du COVID-19aren izurria, osasun krisiak ondorio ekonomiko eta sozial larriak utzi dituelako eta 695 nafar hil direlako gaurdaino, horietako bost atzo. Euskal Autonomia Erkidegoan, aldiz, ELA, LAB, SATSE, SME, CCOO, UGT, ESK, SAE eta UTESE sindikatuek Osakidetzan lurraldeka deituriko hiru greba egunetako lehena izan dute gaur Araban.

Donostiak emaitza onak eskuratu ditu energian, ingurumen kalitatean, hondakinen birziklatzean eta mugikortasun iraunkorrean. Cristina Enea Fundazioaren Iraunkortasunaren eta Klimaren Behatokiak Donostiako Iraunkortasunari eta Klimari buruzko Urteko Txostena argitaratu du, 2019ko datuekin.

Pentsio duinen aldeko mugimenduak asteleheneroko elkarretaratzeak antolatzen hasi eta hilabete gutxira, soilik emakumeek osatutako talde baten beharra nabaritu zuten andrazko batzuek, eta hortik sortu zen Oneka 2018ko udazkenean. Proiektu honetara sartu zirenek uste zuten emakume pentsiodunek bazituztela arazo gehigarri batzuk astelehenetako manifestazioetan eta elkarretaratzeetan azalera ekartzen ez zirenak, Ana Mezo plataformako kideak «bakardadea» eta «zailtasun ekonomiko are handiagoa» aipatu ditu kasurako.

Euskarabilduaren bederatzigarren edizioan bi gai uztartu dituzte: pandemia garaian agerian geratutako datuen zaintza eta horren aurrean teknologia burujabetzak egin ditzakeen ekarpenak. Besteak beste, honako galderei erantzun nahi izan die jardunaldiak: Sortzen ditugun datuak zertarako erabiltzen dituzte erraldoi teknologikoek? Zuzenbide Estatuaren ikuspegitik zein erabilera eman dakioke herritarren datuei? Pribatutasunak zer leku hartzen du?