Gurean Gaur

Ekonomia suspertzeko asmoz Europar Batasunak iragarri dituen diru-laguntzak jaso ditzaketen proiektuak aztertzeko erakundeen arteko idazkaritza tekniko bat sortzea erabaki dute Eusko Jaurlaritzak eta Araba, Bizkaia eta Gipuzkoako foru aldundiek. Organo hori Ogasun Sailaren menpe egongo da.

Iñigo Urkullu Lehendakariak Yolanda Díaz Lan eta Gizarte Ekonomiako ministroa hartu du gaur goizean Lehendakaritzan. Bileran Idoia Mendia bigarren lehendakiordea eta Lana eta Enpleguko sailburua ere izan da.

Auzitegi Konstituzionalaren osoko bilkurak atzera bota du Quim Torra Generalitateko presidentearen inhabilitazioa bertan behera uzteko eskaera, baina Gorenaren epaiaren aurkako helegitea aztertuko du.

Gurean Gaur albistegiaren baitan, elkarrizketaren tartean EH Bilduko Maddalen Iriarterekin solasteko aukera izan dugu.

Karabakh garaiko hiri garrantzitsuenak bonbardatzen jarraitzen du Azerbaijanek, eta armeniarrak atzera egiten ari dira. Bi aldeek zibilen aurkako erasoak egin izana leporatzen diote elkarri. Stepanekert hiriburuan kalte handiak eragin dituzte dagoeneko bonbardaketek, eta Azerbaijanek dio ez direla geldituko eskualde osoa berreskuratu arte.

Euskal Herriko Eskubide Sozialen Karta osatzen duten sindikatu eta eragileak zein Zaldibar Argituk indarrak batu dituzte zabortegiaren hondamendiko epaiketan herri akusazio gisa aurkezteko. Bestaldetik, Trapagarango Productos Tubulares enpresan hilabetean izandako bigarren heriotzaren kontrako protesta burutu da Bilbon.