Albisteak

Gaur aurkeztu dute Donostiako Udalean Dual izeneko lana, altxaldi frankistan eta ondorengo urteetan fusilatuak izan ziren donostiarrak oroitu eta omenduko dituen eskultura. Amaia Mateos eta Tomas Villanuevak egin dute eskultura, eta martxoaren amaiera aldera jarriko dute Goikoa Jauregiaren aurrean.

Kantauriko kostaldean alerta laranja ezarri dute datozen orduetarako aurreikusten diren haizete eta olatuengatik. 7-8 metro inguruko olatuak espero dira, haizeak indartsu joko du, eta euria erruz botatzen jarraituko du aurreikuspenen arabera. Donostian, esate baterako, Añarbeko urtegia hustutzen ari dira, datozen orduotarako espero diren euriteei aurre egiteko asmoz.

Usurbilen ere sagardoak badu bere lekua. Horrela, Saizar sagardotegian Usurbilgo txotx denboraldiari hasiera eman zioten pasa den urtarrilaren 24an. Hain zuzen ere, Realeko Imanol Agirretxe futbol jokalariak eman zion hasiera denboraldiari. Aurtengo sagardoa "frutatxua eta erraz edateko modukoa" dela adierazi zuten.

Sozialista euskaldunek  Espainiako Gobernuak abortuaren legean egin nahi duen aldaketa gogor kritikatu dute. Emakumeen eskubideen aurkakoa dela eta hauen osasunaren kalterako izango dela esan dute. Horregatik, Batzar Nagusietan bilera monografiko bat eskatzearekin batera, Madrilen larunbatean egingo den manifestazioan izango direla iragarri dute. Bestalde, PPk jakinarazi du Europako haustekundeak igaro arte ez duela indarrean jarriko lege berria.

EH Bilduk egindako agerraldian jakinarazi du abortuaren legearen erreforma gaitzesteko mozioa eramango duela instituzioetara. Bestalde, EAEko eta Nafarroako sistema publikoetan abortu librea bermatzeko, desobedientzia deitu du.

Kimioterapiaren prestakuntza konplexua izaten da, gaixo bakoitzera egokitu behar dutelako. Horretan lagunduko duen robota aurkeztu dute gaur Donostiako Onkologikoan. Kiro Oncology izena jarri diote, eta egun ospitale horretako gaixoen %20arekin erabiltzen badute ere, etorkizunean ia guztiekin erabiltzera helduko direla ziurtatu dute.