Azken bideoak: Gizartea

5.372 lagunek eman dute dagoeneko positibo Euskal Herrian. Horietatik 230 hil dira, eta beste 636 sendatu. Mundu osoan ia 500.000 lagun kutsatu ditu dagoeneko Covid 19-ak. Johns Hopkins unibertsitateak emandako datuen arabera, 491.000 baino gehiago dira dagoeneko 175 herrialdetan positibo emandakoak.

Nahia Idoiagak tesia egin zuen aztertzeko pandemiek eta beraien estaldura mediatikoak nola eragiten zuten emozio eta gizarte irudikapenetan. Orain, EHUko Leioako Hezkuntza fakultateko irakasleekin batera, ikerketa talde batean dago, aztertzen Covid19a euskal gizartean nola eragiten ari den. Klaseak eten aurretik, ikasleak antsietate maila altuekin zeudela ikusita galdeketa sorta zabaldu zuten beraien artean eta ondoren gizarte osoan.

Lan erregulazio txostenak jaso dituzten langileentzat prestazio berezia onartu du Eusko Jaurlaritzako Ogasun eta Ekonomia sailak. Martxoaren 17ko dekretuaren bitartez, halabeharrezko erregulazio txostenetan gehienez soldataren %70eko prestazioa jaso zezaketen langileek eta hori osatzera dator neurria, hau da, Pentsio Erakundean pilatutakotik jaso ahalko luke langile horrek gainerako %30a.

Koronabirusaren pandemiaren aurrean hartutako neurriek gogor kolpatu dituzte ere espetxeak eta presoak. Euskal presoen senide eta lagunek espetxeetara bisitan joateko aukerarik ez dutenez, ostiralean, hilaren 27an, euskal presoei elkartasuna adierazteko saio berezi bat igorriko dute Sarek eta Etxeratek. Etxetik Etxera saioa 19:00etan hasiko da eta ordu erdi iraungo du. Sareren Facebook-eko profilean ikusi ahalko da, eta baita Hamaika Telebistan ere.

Azken egunotan hainbat eragilek egin dute eskari bera. Izenpetutako dokumentuan, arazoaren oinarrira jotzea exijitu dute. Gogorarazi dute zenbait herrialdek, Italiak kasu, jada hartu dutela erabateko konfinamendua ezartzeko erabakia. Haien hitzetan ekonomia garrantzitsua da, baina are gehiago pertsonen bizitzak.

ELA, LAB, ESK, Steilas, EHNE eta Hiru sindikatuek langileen haserrea erakutsi nahi dute bihar. Horrez gain, Koronabirusak eragindako krisia dela-eta langileek pairatzen ari diren egoera "kezkagarria" nabarmendu dute.