Talde txuri-urdinak garaipen argia eskuratu zuen Balaidos futbol zelaian bat eta lau nagusitu ostean. GARAko kazetari Ane Urkiri Ansolarekin batera Realaren jokoaren gakoak aztertu eta Athletic-ek Sevillaren aurka lortutako hiru puntuak izan ditugu hizpide.
Gurean Gaur albistegiaren baitan, nazioarteko errepasoan, Verónica Satrustegi kazetari nafarra izan dugu gurekin: Azkeneko urteak Hego Amerikan igaro ditu, Perun dago uneotan, eta besteak beste bertako zein Txile eta Boliviako aktualitatea errepasatu ditugu berarekin.
Klik Batean lehiaketako sariduna da Marcos Tedin gazte argentinarra. Tedin eta lagunek "Aitzakia" laburmetraia da aurkeztu dutena. Konfinamendu garaian kokatuta kontakizuna euskal diasporaren lekuko zuzena bilakatu da. Irabazitako sosekin Euskal Herrira bidaiatzea da Tedinen asmoa. Barnetegira etorri nahi du euskara hobetzera eta bide batez, Euskal Herria gehiago ezagutzera.
Jasotako azken datuen arabera, EAEn egin diren 12.452 test diagnostikoetatik 972k emaitza positiboa eman dute, eta positibotasun tasa %7,8koa da, atzo erregistratu zena baino puntu eta erdi baxuagoa. Testuinguru honetan, Eusko Jaurlaritzak astearen erdian erabakiko du neurri zorrotzagorik behar ote den.