Albisteak

Igande honetan Baionan egingo den manifestazioan parte hartzeko deia luzatu du EH Bildu koalizioak. “Ni ere banoa” lelopean, giza eskubideak, konponbidea eta bakea aldarriko dira Lapurdiko hiriburuan. Koalizioak azpimarratu du, martxa Ipar Euskal Herriko eragile sozial, politiko eta instituzionalek babestu dutela. Eredugarritzat jo dute eragile guztien jarrera.

Espainiako Auzitegi Nazionalak absolbitutako 40 gazte independentistek agerraldia egin dute Iruñean, erabakiaren balorazioa egiteko. Beraien iritziz, ebazpenak agerian uzten du auzipetuetako asko torturatuak izan zirela eta 26/11 sumarioa bera ere tortura horietan oinarritu zela. Pozik agertu dira, batez ere erabakiak herritarren askoren poza sortu duelako. Horrekin batera, konponbideak berrogei militante irabazi dituela azpimarratu dute.

Gipuzkoako Foru Aldundiak AHTren lanen ondorioz zor dizkion 7,5 milioi euro itzultzeko eskatu dio Eusko Jaurlaritzari. Larraitz Ugarte Mugikortasun diputatuak azaldu duenez, aurreko legealdian ahozko akordio bat egin zuten Jaurlaritzak eta Aldundiak. Honen arabera, Aldundiak AHTn eragina zuten hainbat lan burutuko zituen eta ostean jasoko zituen 7,5 milioi euro. Bere garaian EAJko Arantxa Tapiak egin zuen eskaera eta ez zieten itzuli. Orain, Aldundia da eskera egiten duena, eta Tapia Eusko Jaurlaritzako Kontseilari izanik, ez da zorra itzuli.

Nafarroako Gobernuak Etxebizitza Sozialeko Foru Funtsa sortuko du, diru sarreren murrizketaren ondorioz bazterketa-soziala eta etxegabetzea pairatzeko arriskuan dauden pertsonei aldi baterako etxebizitza emateko. Etxebizitza berria alokairuan edo erosteko aukerarekin emango diete. Lehenengo urtean, familiek alokairuaren %90 ordaintzeko diru laguntza izango dute

Amaitu da Gipuzkoako Foru Aldundiak bultzatutako Partaidetzazko Aurrekontuaren ekimenaren lehen fasea. 2 milioi euro zein proiektutan inbertitu erabakiko dute Oarsoaldean, Tolosaldean, Urola Erdian eta Bidasoaldean. Lehen fasean herritarren proposamenak jaso dituzte, guztira 830. Hauen artean hogei inguru hautatu eta aldundira bideratuko dituzte, bertan azter ditzaten.

Gazte independentisten epaiketan auzipetutako berrogei gazteak absolbitu dituzte. Epaiak gazteek inkomunikazioan egindako deklarazioak baliogabetu ditu eta zalantzan jarri du modu librean deklaratu ote zuten. Gazte independetistak izeneko plataforman bazebiltzala baina horrek ETAren mendekotasunik ez duela dio.