Azken bideoak: Gobernua

Datorren urterako 875 milioi euroko aurrekontua aurkeztu du Gipuzkoako Foru Aldundiak, iaz baino %2,22 handiagoa. Markel Olano ahaldun nagusiaren hitzetan, "etorkizunerako prestatzeko aurrekontua" da aurkeztu dutena. Gipuzkoarekin eta gipuzkoarrekin erabat konektatutako aurrekontua aurkeztu dutela nabarmendu du Olanok.

Hala, aurrekontuan jaso dute diruz hornitzea aldundiak estrategikotzat jotzen dituen arloak eta proiektuak: gizarte politikara ia 390 milioi euro bideratu dituzte, iaz baino hamahiru milioi gehiago, eta hamabi milioi euro izango dituzte Etorkizuna Eraikiz egitasmoaren barneko ekinaldiek: Ziur zibersegurtasun zentroak, Adinberri zahartzaroari buruzkoak eta klima aldaketaren aurkako institutuak, besteak beste.

Edonola ere, etorkizunean krisi ekonomikoa etorriz gero, ziklo ekonomikoa aldatzen denerako prest egoteko erabaki hartu du Gipuzkoako Foru Aldundiak. Jabier Larrañaga Ogasun diputatuak adierazi du horregatik erabaki dutela aurten zor berririk ez jaulkitzea. Horrenbestez, 527 milioi eurotik 478 milioira jaitsiko da Gipuzkoako Aldundiak berezkotzat jotzen duen zorra. 49 milioi gutxiago dira horiek.

EAJk eta EH Bilduk konpromisoa hartu dute EAEko aurrekontuetarako akordioa lortzeko hizketan segitzeko. Goizean egin dute bilkura, Sabin Etxean, Eusko Jaurlaritzak aurkeztutako aurrekontu proiektuari EH Bilduk egindako zuzenketa proposamenez eztabaidatzeko.

Bi abstentzioren bermea emango luke aurrekontuen bozketan EH Bilduk, pentsiorik apalenak osatzeko 350 milioi euro inbertitzeko eta enplegu politiketarako beste 70 milioi euro jartzeko haren proposamena aintzat hartuz gero. EAJk, edonola ere, EH Bilduri eskatu dio pentsioez eta enpleguaz egindako proposamena egokitu beharko lukeela.

Koalizio subiranistak, ordea, haren proposamena 2eraldatzailea, eraikitzailea eta egingarria" dela uste du, eta Arnaldo Otegi koordinatzaile nagusiaren hitzetan, zifretatik harago, herritarrak eta haien bizi proiektuak erdigunean jartzeko hautu politikoa da EH Bildurena.

EH Bildu koalizioak aukerak ikusten ditu Eusko Jaurlaritzarekin akordioa lortu eta 2019ko aurrekontuari bide emateko. Elkarrekin Podemosen iritziz, ordea, aurrekontuetan egin daitekeen edozein aldaketa onartzea ez da ezkerreko alderdi batek izan behar lukeen jarrera.

Leire Pinedo legebiltzarkidearen hitzetan, EH Bilduk aurrekontuetarako pentsioez eta enpleguaz egindako proposamenak onartzeko borondate politikoa soilik behar da. Pinedok berretsi du EH Bilduko legebiltzarkide taldea prest dagoela bi abstentziorekin aurrekontuak aurrera ateratzen uzteko, beti ere, pentsiodunek, emakumeek eta gazteek kalean plazaratutako beharrak aurrekontuen bidez aseko direla bermatzen bada.

Eusko Jaurlaritzak 11.784,1 milioi euro gastatzea aurreikusi du 2019. urterako aurrekontu proiektuan. 371 milioi eurora mugatu du Jaurlaritzak datorren urterako gastu hazkundea. Zorpetze gastua eta AHTren diru saila kenduta, beraz, aurten baino %3,6 diru gehiago izango du eskura politika propioak garatzeko. Pedro Azpiazu Ogasun sailburuak zero defizita duen kontu proiektua aurkeztu du, eta ohartarazi du ez dela posible izango gehiago gastatzea, gastu araua urratuko lukeelako.

Hazkunde horren zati handi bat langile eta funtzionamendu gastuetarako erabiliko da, aurten baino 205 milioi gehiago bideratzea jaso du proiektuak. Besteak beste, langile publikoei eskaini zaien soldata igoera sartuko litzateke igoera horretan. Halaber, Inbertsio publiko propioa %7,4 igoko dela nabarmendu du sailburuak. Azpiazuren hitzetan, horiek dira aurrekontuen gakoak: inbertsio publikoak eta izaera soziala.

Aurrekontu esparru horrek definituko ditu kontuak aurrera ateratzeko oposizioarekin egin beharreko negoziazioak. EH Bildu eta Elkarrekin Podemos proposamen zehatzak lantzen ari dira, eta agiri bana helarazi diote Ogasun Sailari. PPk lehen bilera sorta egin du Azpiazurekin, baina ez du igorri dokumenturik.

Elkarrekin Podemosei dagokionez, bidalitako lehen proposamenak gastu hazkunde oso handia zekarrela gogoratu du Ogasun salburuak. Elkarrekin Podemosen izenean, ordea, Julen Bollainek esan du haien eskaerak bere horretan mantentzen direla.

Eusko Jaurlaritzak 11.784,1 milioi euro gastatzea aurreikusi du 2019. urterako aurrekontu proiektuan. 371 milioi eurora mugatu du Jaurlaritzak datorren urterako gastu hazkundea. Zorpetze gastua eta AHTren diru saila kenduta, beraz, aurten baino %3,6 diru gehiago izango du eskura politika propioak garatzeko.

Pedro Azpiazu Ogasun sailburuak zero defizita duen kontu proiektua aurkeztu du, eta ohartarazi du ez dela posible izango gehiago gastatzea, gastu araua urratuko lukeelako. Hazkunde horren zati handi bat langile eta funtzionamendu gastuetarako erabiliko da, aurten baino 205 milioi gehiago bideratzea jaso du proiektuak. Besteak beste, langile publikoei eskaini zaien soldata igoera sartuko litzateke igoera horretan. Halaber, Inbertsio publiko propioa %7,4 igoko dela nabarmendu du sailburuak. Azpiazuren hitzetan, horiek dira aurrekontuen gakoak: inbertsio publikoak eta izaera soziala.

Aurrekontu esparru horrek definituko ditu kontuak aurrera ateratzeko oposizioarekin egin beharreko negoziazioak. EH Bildu eta Elkarrekin Podemos proposamen zehatzak lantzen ari dira, eta agiri bana helarazi diote Ogasun Sailari. PPk lehen bilera sorta egin du Azpiazurekin, baina ez du igorri dokumenturik.

EH Bilduk 420 milioi euroko akordioa eskaini du, aurrekontuak onartzeko bi abstentzioren truke. Diru horretatik 70 milioi euro enplegu planak eta ekintzak finantzatzeko erabiliko lirateke. Zatirik handiena, berriz, 350 milioi eurokoa, pentsiorik txikienak osatzeko. Arnaldo Otegi EH Bilduko koordinatzailearen hitzetan, proposamen bideragarria da koalizioak mahai gainean jarritakoa eta jeltzaleek eta sozialistek ere hala adierazi omen diete. Beraz, borondate politikoa soilik falta dela iruditzen zaio.

Azpiazuk zalantzak agertu ditu pentsioak osatzeko aukerari buruz. Sailburuaren ustez, EAEk daukan "eskumen esparrutik kanpo" daude pentsioak, eta Espainiako Kongresuan negoziatu beharko litzateke horien igoera. Hori da, hain justu, aste hasieran, EBBko presidente Andoni Ortuzarrek gogorarazi duena.

Elkarrekin Podemosei dagokionez, bidali zuten lehen proposamenak gastu hazkunde oso handia zekarrela gogoratu du Ogasun salburuak. Hain justu, Podemoseko idazkari nagusi Pablo Iglesiasek Eusko Jaurlaritzako lehendakari Iñigo Urkullurekin egindako bileraren biharamunean. Espainiako Estatuko egoeraz egin zuten bileran, besteak beste, Espainiako aurrekontuen onarpena ere izan zuten hizpide. Iglesiasek, edonola ere, argi utzi du Madrilgo kontuek ez dutela EAEkoekin loturarik, eta Elkarrekin Podemosi dagokiola azken horien inguruko erabakia.

Hala ere, Elkarrekin Podemoseko legebiltzarkide Lander Martinezen azken adierazpenetan "norabide aldaketa" sumatu du. PPk bere burua urrundu du akordiotik, baina Azpiazuk ez du bide hori bukatutzat eman nahi eta asmoa du popularrekin berriro biltzeko. Haren ustez, aurrekontu onak direlako eta onartzea mesedegarria izango delako.

Iñigo Urkullu Eusko Jaurlaritzako lehendakaria Pablo Iglesias Podemoseko idazkari nagusiarekin bildu da, Espainiako Estatuko egoeraz hitz egin eta aurrekontuen gaiaz zein Kataluniako egoeraz aritzeko.

Izan ere Podemosek lortu du akordioa Pedro Sanchez Espainiako Gobernuko presidentearekin 2019ko aurrekontuak aurrera ateratzeko, baina diputatuen kongresuan babes handiagoa behar dute, besteak beste, alderdi subiranista katalanenak eta EAJrenak.

Ba Aitor Esteban Espainiako kongresuko diputatu jeltzaleak esan du Iglesiasek badakiela aurrekontuez EAJrekin negoziatu behar duela, eta ez lehendakaritzarekin.

Jeltzaleek 2019ko Espainiako aurrekontuez izango duten jarrera, berriz, Madrilek errespetatu egin beharko du 2018ko aurrekontuetarako jeltzaleekin egindako akordioa.

Iglesiasek Urkullurekin biltzeko hartutako erabakiarekin bereziki kritiko agertu dira popularrak. Pedro Sanchezen gobernuaren ordezkari izatea leporatu dio Amaya Fernandez PPren Euskadiko idazkari nagusiak. Eta ohartarazi du PSOEk eta Podemosek adostutako aurrekontuak kaltegarriak liratekeela EAErako.

EH Bilduko koordinatzaile nagusi Arnaldo Otegik, berriz, EAEko aurrekontuez hitz egiteko koalizioarekin bildu ez den bitartean, Iglesiasekin biltzeko prest egoteagatik kritikatu du Urkullu.