2018. urtea hasi zenetik, gutxienez, 50 langile hil dira Euskal Herrian. Hori da LAB sindikatuak publiko egindako datua. Azkena, Zornotzan, joan den larunbatean, AHTren eraikuntza lanetan. 50 horietako lau, berriz, Araban hil dira, 24 Bizkaian, bost Gipuzkoan, bat Ipar Euskal Herrian eta 16 Nafarroan. Edonola ere, LABek salatu du AHT eraikitzeko lanetan hildakoak, gutxienez, zazpi langile izan direla.
Lan heriotzez gain, lanean gertatutako istripu arin eta larriak ere salatu beharrekoak dira, sindikatuaren arabera. Eta horien jatorrian, lan baldintza kaskarrak daude: prekarietatea, azpikontratazioa edota behin-behinekotasuna, besteak beste. AHTren obretan, gainera, salatu dute eraikuntzako herrialdeko hitzarmena sistematikoki ez dela betetzen.
Bien bitartean, Arantxa Tapia Ekonomiaren Garapena eta Azpiegituretako sailburuak astelehenez hartu du hitza Eusko Legebiltzarrean, AHTren lanetako atzerapenez eta kosteez argibideak emateko. Zehazki, Tapiak eraikuntzaren atzerapena onartu du, baina 2023rako abian egongo dela ziurtatuta.
Baina LABek salatu du Tapiak ez diela aipamenik ere egin AHTren obretan izandako istripuei. Are gehiago, sailburuari egotzi dio langileenganako presioa egiten aritzea: presa sartzen dielako eta haien eskubideak eta osasuna kontuan hartu gabe lana prekarizatzen duelako, beti ere, sindikatuaren arabera.
Gainera, AHTk eta antzeko azpiegiturek ingurumena suntsitzen dutela ere salatu du LABek. Hargatik, sindikatuko gizarte ekintza arloak mobilizatzeko deia egin du, hain justu, larunbaterako martxa antolatu dute AHTren eraikuntzako Martzillako eremura.