Azken bideoak: Sindikatuak

Osasun krisiak hankaz gora jarri ditu zenbait sektore, eta kalteak nabarmenak dira gehienentzat dagoeneko. Eragina nabarmena izaten ari da lehen sektorean, esaterako. Besteak beste, nekazariak zailtasun ugari izaten ari dira beren produktuak saltzeko. Jende pilaketak saihesteko aitzakiarekin, baserritarren azokak egitea debekatu zuen jaurlaritzak eta gerora, atzera bota du neurria. Hariari tiraka, Amets Ladislao EHNEko kideak esan legez, horrek argi utzi du, beste behin ere, administrazioak zeren alde egiten duten. Artean, baratzera joateko irizpideak indartu egin ditu Espainiako Gobernuak kontrakoa espero zen arren. Ezagutzen ez duten arlo baten gainean agintzea leporatu die Ladislaok administrazioei.

Elkarrizketaren tartean, LABeko idazkari nagusi Garbiñe Aranbururekin hitz egiteko aukera izan dugu. Covid 19 gaitzak eragindako krisi sanitario eta ekoomikoa aztertzeaz gain, Eusko Jaurlaritzak, Nafarroako gobernuak eta Hego Euskal Herriko patronalek izandako jarrera gogor kritikatu eta bide penala erabiltzeko aukera berretsi ditu.

ELA eta LAB sindikatuek salaketa jarri dute Eusko Jaurlaritzaren eta Nafarroako Gobernuaren aurka, milaka langileren bizia eta osasuna arriskuan jartzeagatik. Bestalde, Michelin multinazionalak bere jarduerari ekingo dio pixkanaka Gasteizko eta Lasarte-Oriako lantegietan hilaren 14tik aurrera. Sidenorrek ere hilaren 14an zabalduko ditu bere Basauriko, Gasteizko eta Azkoitiko fabrikak. Aldiz, Volkswagenek, apirilaren 20an.

Konfinamendua ezarri zenetik astebete igaro dela azaldu du Xabier Ugartemendia Ekintza Sindikaleko eta Negoziazio Kolektiboko Idazkariak, eta bizitzari bai, baina lanari konfinamendurik ezarri ez zaiola salatu du. Oinarrizkoak ez diren lanen geratzea eskatu du, eta horrekin batera, oinarrizko lanetan diharduten langileen segurtasuna babestea.

LAB sindiaktuak salatu du armada kalera atera dutela agintarien, baina ez direla langileen osasuna zaintzen ari. Zentzu horretan, berrogeialdian oinarrizkoak ez diren lan jarduerak eskatu du Garbiñe Aranburu LAB sindikatuko idazkari nagusiak.

Elkarrizketaren tartean, CCOO Euskadiko zuzendaritzako kide Alfonso Rios Hamaika Telebistan egon da. 2020ko urte hasieran izandako lan istripuen harira, kezka eta samina azaltzeaz gain, "lan istripuak enpresariek prebentzio neurriak eta euren egin beharrak betetzen ez dituztelako ematen direla” salatu du. Horrekin batera, “Zaldibarren gertatutakoa lan istripu bat baino gehiago izan da, ingurumenarekin lotutako krisia bat da baita eta hondakinen kudeaketa negozio eredu bilakatzearekin zerikusia duena” nabarmendu du. Auzi honekin lotuta, amiantoaren agerpenaren inguruko kezka agertu eta Arriola sailburuaren jarrera kritikatu du.